Suraxanı rayonu, Dədə Qorqud qəsəbəsində məcburi köçkün ailəsinə basqın edilib. 

Laçın rayonundan olan məcburi köçkün İlqar Cabbarovun evinə girən 3 maskalı şəxs onun həyat yoldaşının əl-qolunu bağlayıb, ağzına "skoç" vurub, evdən 25 min manat pul və 5 min dəyərində qızıl oğurlayıblar. Bu dəhşətli hadisə 1 və 4 yaşlı uşaqların gözü qabağında baş verib. 

İlqar Cabbarovun həyat yoldaşı Gülnar ans-ə verdiyi açıqlamasında bildirdi ki, avqustun 21-də səhər saatlarında maskalı şəxslər qonşu adı altında onu aldadıblar, qapı açıldıqdan sonra isə evə giriblər: 

"Həyat yoldaşım səhər tezdən evdən çıxıb işə getmişdi. Maskalılar mənə bıçaq çıxardaraq, səs-küy salmamağımı tələb etdilər. Məndən pulların və qızılların harada olduğunu soruşdular. Evdə pul olmadığını, yoldaşımın pulları üzərində götürdüyümü dedim. Qızılların da Əhmədlidə qohumlarımızgildə saxladığımızı dedim. Üstümdəki sırğaları, üzüyü, boyunbağını açıb götürdülər. Və evləri axtardılar. Əllərimi skoçla bağlamaq istəyəndə müqavimət göstərdim.

Bu zaman uşaqlar ağlaşmağa başladı. Yalvardım ki, imkan verin uşaqların yanına gedim. Xəstə uşaqdır. Ağlayanda özündən gedir. Buna məhəl qoymadılar. Bu zaman özümdən getdim. Onlar isə otaqları axtarmağa başladıllar. Özümə birtəhər gəlib qonşuları köməyə çağırmaq üçün çölə qaçdım. Qohumumuzun evi bizdən 200 metr uzaqlıqda idi. Ora çatıb, hadisəni deyəndən sonra geri qayıtdım. Evdə olan pulun və qızılların oğurlandığlnı və maskalı şəxslərin isə qaçıb getdiyini gördüm.

Hadisə ilə bağlı 102 xidmətinə məlumat verdik".

Gülnar Cabbarovanın sözlərinə inansaq, evdə 25 min manat pulun olması barədə qohumları və evə gedib-gələnlərin əksəriyyətinin xəbəri olub: "Bizim ev o qədər gözəgəlimli deyil. Heç kim inanmazdı ki, belə evdə bu qədər pul olar. Heç polislər də inanmadılar. Sonardan bizi sorğu sual edəndən sonra inandılar. Yoldaşım qəssab işləyir. Bərdədən Bakıya mal-heyvan dalınca gedir-gəlir".

Qeyd edək ki, basqın hadisəsi ilə bağlı Suraxanı rayon Polis İdarəsinin 30-cü Polis Bölməsi araşdırma aparır. Bölmənin növbətçi hissəsindən də oğurluq hadisəsinin olduğunu təsdiqləsələr də əlavə məlumat verə bilməyəcəklərini dedilər.

Gülnar Cabbarovanın dediyinə görə, maskalı şəxsləri və onların gəldikləri maşını qonşular görüb.

Gülnar Cabbarovanın qardaşı Atim Məmmədov isə bacısının həyatı üçün olan təhlükədən narahat olduğunu bildirdi. Onun sözlərinə görə, polis hadisə ilə bağlı lazım olan işləri görməyib: 

"Məsələn evdə ekspertiza aparılmayıb, qonşu qız dindirilməyib. sadəcə maskalı şəxslərin maşınının rənginin "metallik" olduğunu eşidib, qəsəbədə makler işləyən birini gətirib, bacımın onu tanıyıb tanımadığını soruşublar. Bacım da maskalı şəxslərin heç birinin ona oxşamadığını bildirib. Qohumlar və evə gedib-gələnlərdən şübhələndiyimiz adamlar var. Yeznəmin dayısı oğlunun dostu olduğu bildirilən Qarayağdı adlı adamı üzləşdirmək üçün evə gətiriblər. Bacım onu görən kimi özündən gedib. Özünə gələndə maskalı şəxslərdən birinin həmin Qarayağdı olduğunu deyib.

Digər birinin isə onun dostu Aqşin olduğuna şübhəmiz var. Hər ikisi bacımgildə vaxti ilə qonaq olublar. Bu barədə polisə də məlumat vermişik. Polis həmin Qarayağdı adlı şəxsi saxlamayıb, Tərtərdə Murad adlı adam zəng edərək Qarayağdını buraxdırıb. 3 gündür ki, həmin şəxs barədə heç bir tədbir görülməyib. Bacımın onu tanıdığına görə, gəlib bacımı öldürə də bilər. Bu variant istisna deyil. Məcbur qalıb rayondan gəlib, bacımın yanında qalıram".