Dünya şöhrətli azərbaycanlı alim Lütfi Zadənin Bakıda dəfn olunacağı yer məlumdur. O, I Fəxri xiyabanda dəfn olunacaq.

Bir neçə gün bundan əvvəl hər kəs məzar yerinin görüntüləri ilə də tanış oldu. Digər tərəfdən, Lüfti Zadənin məzar yeri ilə bağlı müxtəlif fikirlər səsləndirilir. Seçilən yerin düzgün olmadığını, məzar yerinin dəyişdirilməli olduğunu qeyd edənlər var.

Narazılıq isə Fəxri Xiyabandakı bolşevik məzarları ilə bağlıdır. Belə ki, Fəxri Xiyabanda hələ də üzərinə "Müsavat cəlladları" sözü yazılmış başdaşları var və düşünülür ki, Lütfi Zadənin həmin qəbirlərin əhatəsində dəfn edilməsi yanlışdır.

Bu baxımdan maraqlıdır, narazılıqlar nəzərə alınaraq, Lütfi Zadənin məzar yeri dəyişdiriləcəkmi? Eyni zamanda görkəmli alim üçün  qəbirüstü abidə hazırlanıbmı?

Məsələ ilə əlaqədar Bakı Şəhər Mənzil Kommunal Təsərrüfatı Departamentinin Əhaliyə Vətəndaşlıq Xidməti Trestinin baş mühəndisi Sabir Həsənov Modern.az-a bildirib ki, Lütfi Zadənin məzarı bir neçə gün əvvəl qazılıb və məzar yeri dəyişdirilməyəcək:

“Lütfi Zadə hələ dəfn olunmayıb. Amma bildiyiniz kimi, artıq məzar yeri hazırdır. Təbii ki, qəbirüstü abidə də olmalıdır. Sadəcə, Lütfi Zadənin dəfn olunmasını gözləyirik. Hələ ki heç nə hazırlanmır. Yalnız dəfndən sonra məsələyə baxılacaq. 

Məzar yeri ilə bağlı məsələyə gəldikdə isə bizə narazılığını ifadə edən olmayıb. Bu səbəbdən məzar  yerinin dəyişdirilmə ehtimalı yoxdur”.

Qeyd edək ki, sentyabrın 6-da ABŞ-da Kaliforniyada vəfat edən Lütfi Zadənin nəşi yaxın günlərdə Azərbaycana gətiriləcək.