Şərqin ilk demokratik cümhuriyəti olan Azərbaycan Xalq Cümhuriyetinin quruluşunun 97-ci ildönümü Türkiyənin İzmir şəhərində Azərbaycan Qardaşlıq və Əməkdaşlıq Cəmiyyəti tərəfindən qeyd edildi.

Tədbir İzmirin en böyük salonlarından olan İsmət İnönü  Sanat Mərkəzində təşkil olundu və kokteyllə başladı. Daha sonra tədbirin rəsmi və bədii hissəsinə keçildi.

Tədbir Azərbaycan və Türkiyənin müstəqilliyi uğrunda şəhit olanların və 19 May tarixində Bakıda çox mərtəbəli binada çıxan yanğında həyatlarını itirənlərin mənəvi huzurunda bir dəqiqəlik sayğı duruşu və ardından hər iki ölkənin himnlərinin oxunması ilə başladı.

Daha sonra söz alan Azərbaycan Qardaşlıq və Əməkdaşlıq Cəmiyyətinin (AKİDER) sədri Dr. Asıf Kurban gələn qonaqlara bu günün əhəmiyyətiylə bağlı ətraflı məlumat verərək,  cümhuriyyətin yaranması, sonradan süquta uğrasa da, aradan 70 il sonra yenidən bayrağımızın göylərə yüksəldilməsini, hazırda da o bayrağın əmin əllərdə olduğunu xüsusi ilə vurğuladı.

 O, müstəqil Azərbaycan vətəndaşı olmağın böyük şərəf, qürur verməsini xüsusi olaraq qeyd edərək, tədbirin təşkilində əməği olanlara və gəldikləri üçün qonaqlara təşəkkür edərək sözlərini tamamladı.

İzmir şəhər merinin nümayəndəsi Muzaffər Tunçağ, İstanbul Azərbaycan Mədəniyyət Evinin Sədri Hikmət Əlp, İzmir Vəkillər Kollegiyasının sədri Aydın Özcan, Xaricdəki Türklər ve Əqrəba Cəmiyyətlər Komitəsinin İzmir sədri Fırat Yaldız da çıxış edərək, bu gün münasibətiylə Azərbaycanı və Azərbaycanlıları təbrik etdilər və eyni zamanda bu önəmli günlə əlaqədar tədbir təşkil etdikləri üçün cəmiyyətə təşəkkür etdilər.

Tədbirin bədii hissəsi gənç müğənnilərdən Elgün Quliyevin və Təbrizdən gələn Barış Qrubunun möhtəşəm konserti ilə dəvam etdi və bu çıxışlar qonaqlar tərəfindən alqışlarla qarşılandı. Tədbirdə həmçinin İzmirdə təhsil alan Azərbaycanlı tələbələr tərəfindən şeirlər söyləndi.

Proqramın sonunda tədbirin təşkilinə dəstək verənlərə plaket verildi və birlikdə şəkil çəkildi.

Tədbirə  müxtəlif siyasi partiyalar və qeyri-hökümət təşkilatlarının sədr və nümayəndələri, İzmirdə yaşayan azərbaycanlı ailələr, bu şəhərdə təhsil alan Azərbaycanlı və xarici tələbələr və İzmir şəhər sakinləri iştirak etdilər.