Kommunal xidmətlərə görə məcburi köçkünlərə verilən güzəştlərin ləğv edilməsilə bağlı müəmmalar davam etməkdədir.

Məsələ ilə bağlı Qaçqınların və Məcburi Köçkünlərin işləri üzrə Dövlət Komitəsinin mətbuat xidmətinin rəhbəri Elçin Qədimov Modern.az-a deyib ki, hələlik bu haqda rəsmi qərar yoxdur.

Əli Həsənovun anonsu...

Xatırladaq ki, məsələ ilə bağlı müəmmalı vəziyyətin yaranmasına səbəb də elə “Dövlətqaçqınkim”un sədri Əli Həsənovun ötən ilin sonlarında Nazirlər Kabinetinin iclasındakı çıxışı olub.

Həmin toplantıda Baş nazirin müavini bildirmişdi ki, məcburi köçkünlərə yardımların verilməsi ilə bağlı yeni sənədin layihəsi hazırdır və hökumətə təqdim olunub: 

«Məcburi köçkünlərə ayrılan vəsaitin ödənişində yeni qaydaların və sosial ədalət prinsipinin tətbiq edilməsi məqsədilə təkliflər zərfi hazırlanaraq Baş nazirə təqdim edilib. Yaxın günlərdə məsələnin Baş nazirin yanında aidiyyəti nazirlik və xidmət təşkilatlarının rəhbərlərinin iştirakı ilə müzakirəsi nəzərdə tutulur.

Yeni qaydalar 2017-ci il yanvar ayının əvvəlindən tətbiq ediləcək. Bunun üçün hüquqi sənəd – Nazirlər Kabinetinin qərarı qəbul ediləcək. Yemək xərci müavinəti ilə bağlı yeni qaydalar isə hazırlanaraq Ədliyyə Nazirliyində qeydiyyatdan keçirilib. Məcburi köçkünlərə kommunal xidmət xərclərinin verilməsində də dəyişikliklər olacaq”.

Qeyd edək ki, indiyədək məcburi köçkünlər kommunal xərclərdən müəyyən limit daxilində azad idilər. Amma gözlənilən dəyişiklik nəticəsində həmin limitə görə ayrılan məbləğin köçkünlərin özünə verilməsi nəzərdə tutulurdu ki, xərcləri özləri  ödəsinlər. 

«Belə ki, kommunal xidmət xərclərinin məcburi köçkünlər tərəfindən ödənişini təmin etmək məqsədilə həmin vəsait yemək xərci üçün müavinətlə bağlı plastik karta əlavə edilməklə, nağd şəkildə məcburi köçkünlərin özlərinə veriləcək və bunun icrasına 2017-ci ilin yanvarında başlanılacaq»-deyə Ə.Həsənov bildirmişdi.

Məcburi köçkünlər çaşqın vəziyyətdə

Məsələ ilə bağlı Modern.az-a danışan Xocalıdan olan deputat Elman Məmmədov hazırda cəbhə bölgəsində, Şuşa məcburi köçkünlərilə görüşdə olduğunu bildirib:

“Biz hazırda Şuşa Rayon İcra Hakimiyyətinin başçısı Bayram Səfərovla birlikdə  Ağcabədi və Ağdam rayonları arasında “Haramı” zonasındayıq. İnsanlarla görüşürük, onları dinləyirik. Məcburi köçkünlərin də ən çox maraqlandığı mövzu məhz budur. Düzü, məsələ “Dövlətqaçqınkom” tərəfindən rəsmi təsdiqlənmədiyindən, biz də də insanlara dəqiq bir söz deyə bilmədik. Amma bildiyim qədərilə bəzi məsələlərin həllindən sonra qərar qüvvəyə minməlidir”.

Deputat deyib ki, hazırda yeni qaydalar üzərində işlər gedir:

“Müəyyən proseslər gedir, amma limitlər, müavinətlərlə bağlı rəsmiləşmə olmayıb. Rəsmi məlumat olmayandan sonra çöldən-çölə danışmaq doğru deyil”.

Yanvar  ayının kommunal xidmət haqlarını kim ödəyəcək?...

Qaçqınların və Məcburi Köçkünlərin işləri üzrə Dövlət Komitəsinin yaydığı məlumatda deyilirdi ki, ölkə ərazisində öz yaşayış ünvanlarını dəyişərkən faktiki istehlaka görə kommunal xidmət xərclərinin ödənilməsi üçün həyata keçirilən müəyyən prosedur qaydaları artıq əlavə problemlərin yaradılmasına gətirib çıxarırdı.

Məcburi köçkünlərin həmin müraciətləri nəzərə alınaraq onların istifadə etdiyi kommunal xidmətlərin dəyərinin plastik kart vasitəsilə onların özlərinə verilməsi məsələsi xeyli vaxtdır ki, müvafiq dövlət qurumları ilə  müzakirə olunur.

“Burada əsas məqsəd məcburi köçkünlərin müstəqil həyat tərzinə uyğunlaşdırılması, torpaqlar işğaldan azad olunandan sonra onların qayıdıb öz torpaqlarında adaptasiya olunmalarına hazırlıq, məcburi köçkünlərin özlərində müəyyən iş vərdişlərinin, əlavə dolanışıq imkanlarının yaranması, dövlət büdcəsinin vəsaitinin qənaətlə istifadə olunması və israfçılığın qarşısının alınmasından ibarətdir”,-deyə “Dövlətqaçqınkom” bəyan edib.

Qeyd edək ki, hökumət tərəfindən Qaçqın və Məcburi Köçkünlərin İşləri üzrə Dövlət Komitəsinə ayrılan vəsaitlər hesabına məcburi köçkünlərin kommunal xidmətləri xüsusi limit tətbiq edilməklə ödənilir. Eyni zamanda məcburi köçkünlərə 18 manat aylıq yemək xərci verilir.

Məcburi köçkünlərə adambaşına ayda 150 kVt.saat elektrik enerjisindən pulsuz istifadə limiti ayrılıb. Məcburi köçkünlər yay aylarında 100 kVt. saat, qış aylarında isə 200 kVt .saat elektrik enerjisi sərf edirlər. Orta hesabla bu,150 kVt.saat götürülüb. 

Bundan başqa, adambaşına köçkünlərə bir ay üçün 35 kubmetr təbii qaz hesablanıb. Dörd ay qış müddətində təbii qazdan istifadə 45 kub, mart, aprel, may və oktyabr ayları üçün 35 kub, yerdə qalan 4 ay üçün isə orta sərfiyyat 25 kubdan hesablanır. 

Məcburi köçkünlər üçün adambaşına su istehlakı limiti aylıq 5 kubdur. 

Məcburi köçkünləri narahat edən də odur ki, bu ay istifadə etdikləri kommunal xərclərin ödənişi kim tərəfindən ödəniləcək?...