“Brüsseldə keçirilməsi gözlənilən Xocalı mitinqi Ermənistanın iç üzünün açılması üçün böyük vasitə olacaq”. 

Azadinform-un məlumatına görə, bu sözləri  İzmir Azərbaycan Qardaşlıq və Əməkdaşlıq Cəmiyyəti sədri, Dünya Azərbaycanlıları Konqresinin idarə heyətinin üzvü, Dr. Asif Kurban Brüsseldə gözlənilən Xocalı mitinqi ilə bağlı fikirlərini şərh edərkən bildirib.

Onun fikrincə, XX əsrin böyük soyqırımı aktı olan Xocalı hadisəsi Ermənistanın gerçək üzünü əks etdirir: “Bu mitinq ermənilərin əməllərinə cavab olacaq. Brüssel Avropa Parlamentinin mərkəzi olduğu üçün, bu mitinqin böyük bir əhəmiyyəti var. Dünyanın müxtəlif yerlərində yaşayan soydaşlarımız iştirak edəcəklər”. 

A. Kurban ermənilərin beynəlxalq güclərin əlində alət olaraq, Türk millətinə qarşı dəhşətli soyqırımı siyasətini həyata keçirdiklərini xatırladıb. “XX əsrdə bir neçə dəfə belə hadisə baş verib.

Əslində, dünya birliyinin bu günə qədər susqun vəziyyətdə olması Ermənistanın işğalçılıq siyasətinin davam etdirməsinə rəvac verib. Hazırda Ermənistan bölgədə vəziyyəti gərginləşdirməklə məşğuldur və əsassız olaraq işğal etdiyi Qarabağ torpaqlarından çıxmaq istəmir”. 

Xatırladaq ki, Dünya Azərbaycanlıları Konqresinin Xocalı soyqırımı ilə bağlı mitinqi 26 Fevral 2016-cı il tarixində saat 14-16 arası, Avropa Parlamentinin qarşısında baş tutacaq. Avropanın bir sıra ölkələrindən soydaşlarımızın iştirakı gözlənilir./azadinform.az/