Bu günlərdə Azərbaycan mətbuatında Baş Prokurorluq yanında Korrupsiyaya qarşı Mübarizə Baş İdarəsi əməkdaşları Müdafiə Nazirliyinin Baş hərbi müfəttişliyinin üç yüksək vəzifəli əməkdaşını həbs etməsi barədə məlumat yayılıb.

Azərbaycanın Müdafiə Nazirliyi hərbçilərin həbs olunması ilə bağlı xəbərlərə aydınlıq gətirib.

Nazirliyin mətbuat xidməti ANS-in sorğusuna cavab olaraq deyilib: "Müdafiə Nazirliyi Baş Hərbi İnspeksiyasının əməkdaşları haqqında kütləvi informasiya vasitələrində yayılan xəbərlərlə bağlı bildiririk ki, inspeksiyanın əməkdaşları hərbi xidmət vəzifələrinin icrası zamanı yol verdikləri ciddi qanun pozuntularına görə Müdafiə Nazirliyi rəhbərliyinin göstərişi əsasında müvafiq araşdırma aparılıb.

Toplanmış materiallar qanunamüvafiq tədbir görülməsi üçün Azərbaycan Respublikasının Baş Prokurorluğuna göndərilib. Həmin materiallar əsasında Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsi tərəfindən cinayət işi başlanılmış və hazırda istintaq aparılır."

Bildirilib ki, Azərbaycan Respublikası Prezidenti, Ali Baş Komandan İlham Əliyevin qeyd etdiyi kimi, tutduğu vəzifədən, keçmiş xidmətlərindən asılı olmayaraq xidməti dövründə yol verdiyi qanun pozuntularına görə hər kəs qanun qarşısında məsuliyyət daşıyır.
 

Xatırladaq ki, Baş Prokuror yanında Korrupsiyaya Qarşı Mübarizə Baş İdarəsinin əməkdaşlarının Müdafiə Nazirliyinin Baş Hərbi İnspeksiyasının yüksək rütbəli 3 hərbi qulluqçusunu həbs etməsi barədə xəbər yayılıb. 

Xəbərdə deyilir ki, saxlanılan şəxslər barədə Səbayel Rayon Məhkəməsinin qərarı ilə həbs-qətimkan tədbiri seçilib. Həbs edilən şəxslər korrupsiyada ittiham olunur.