UEFA Avropa Liqasının qrup mərhələsində III turun oyunları keçirilib.

Azərbaycan çempionu "Qarabağ" da növbəti matçına çıxıb.

Qurban Qurbanovun yetirmələri doğma divarlar arasında Yunanıstanın PAOK klubu ilə qarşılaşırb. Keçirdiyi iki oyundan sonra aktivinə sadəcə 1 xal yaza bilən ağdamlılar ilk qələbəsini qazanıb.

Matçın ilk hissəsi çempionumuzun üstünlüyü ilə keçib. Ancaq ələ düşən bir neçə fürsətdən istifadə edə bilməyən ağdamlılar bu üstünlüyü tabloda əks etdirə bilməyiblər. On dəqiqənin tamamında Muarrem rəqib qapısı önündə 2 metr məsafədən sağ cinahdan gələn ideal ötürməyə uğursuz toxunuş edib. Top isə qapı xəttinə paralel gedərək meydandan çıxıb.

Bundan 9 dəqiqə sonra bu dəfə sol cinahdan Ansi Aqollinin ötürməsini saxlamadan sol ayaqla qapıya yönəldən Dino Ndlovunun zərbəsi qapıçı da daxil olmaqla hər kəsi keçsə də, qapı tirinə "iliş"di.

Növbəti hücumda rəqib fərqlənə bilərdi ki, bu dəfə Şehiç diqqətli oynadı. İlk hissənin qalan dəqiqələrini də öndə keçirən təmsilçimiz daha bir neçə dəfə təhlükə yaratsa da, 45 dəqiqənin tamamına kimi nəticə əldə edə bilmədi.

İkinci hissə də təmsilçimizin hücumları ilə başladı. Əvvəlcə Ndlovunun hiyləgər ötürməsini başa düşməyən Muarrem təhlükəni başlamamış bitirdi. 56-cı dəqiqədə isə hesab açıldı.

Maksim Medvedevin zərgər dəqiqliyi ilə ötürdüyü topu oyundankənar vəziyyətdən santimetrlərlə yayınan Dani sağ ayağı ilə qapının uzaq küncünə nişanladı.

Hesab açıldıqdan sonra da "Qarabağ"ın hücumları davam etdi. Bir vəziyyətdə Dino Ndlovunun yerinə oyuna girən Mahir Mədətov qapıçını da keçsə də, zərbə vurmaqda gecikdi.

Oyunun sonuna dəqiqələr qalmış Rahid Əmirquliyev fərqi ikiyə yüksəltdi. Oyunboyu passiv çıxış edən, vəziyyətləri sağa-sola xərcləyən Muarrem mükəmməl ara ötürməsi ilə "15 nömrə"ni qapıçı ilə təkbətəkə yolladı. Rahid isə fürsəti boşa vermədi. Sağ küncə nişanlanan top "qapı dirəyi"ni də "salamlayaraq" tora qovuşdu.

Bununla da komandamız qrupda ilk qələbəsini qazandı.

Avropa Liqası

Qrup mərhələsi, III tur

20 oktyabr

J qrupu

"Qarabağ" - PAOK (Yunanıstan) - 2:0

Qollar: Dani, 56, Rahid Əmirquliyev, 87

Baş hakim: Alon Yefet
Baş hakimin köməkçiləri: Danni Krasikov, Nissan Davidi

Əlavə köməkçi hakimlər: Rua Reinşreyber, Ziv Adler

Dördüncü hakim: Kiril Balikin  (hamısı İsrail)
Hakim-inspektor: İqor İşenko (Ukrayna)
UEFA nümayəndəsi: Rudolf Mannaerts (Belçika)

Bakı. Tofiq Bəhramov adına Respublika stadionu

"Qarabağ": 13. İbrahim Şehiç (q), 2. Qara Qarayev, 5. Maksim Medvedev, 6. Dino Ndlovu, 10. Muarem Muarem, 14. Rəşad Sadıqov (k), 15. Rahid Əmirquliyev, 20. Riçard Almeyda, 25. Ansi Aqolli, 55. Bədavi Hüseynov, 99. Dani Quintana

Ehtiyat oyunçular: 12. Şahruddin Məhəmmədəliyev (q), 11. Mahir Mədətov, 17. Namik Ələskərov, 18. İlqar Qurbanov, 21. Arif Daşdəmirov, 71. Vüqar Nadirov, 91. Coşqun Diniyev

Baş məşqçi: Qurban Qurbanov

PAOK: 71. Panagiotis Qlikos (q) (k), 3. Leo Matos, 4. Marin Leovac, 7. Mame Baba Tiam, 10. Calma Kampos, 15. Xose Angel Krespo, 16. Qyoko Cimirot, 24. Qarri Rodriges, 28. Yevgen Şaxov, 43. Fernando Varela, 87. Xose Kanyas

Ehtiyat oyunçular: 23. Zeliko Brkiç (q), 8. Çaris Çarisis, 13. Stelios Malezas, 14. Fakunda Pereyra, 20. Etimis Kuluris, 21. Dieqo Bisesvar, 70. Stelios Kitsiou

Baş məşqçi: Vladimir İviç

/apasport/